365 درسدروس مميزة

[ دروس تصوير ] الدرس رقم ١٠١ – السفر بالكاميرا

السلام علكيم ورحمة الله وبركاته

الوقت وقت إجازة ولو انها قصيرة نوعاً ما. وكثير من المصورين أو المهتمين في التصوير قرر يسافر.

بس وش آخذ معي من أغراض التصوير ؟

آخذ كاميرتي وكل العدسات ؟ أو تكفيني عدسة وحدة ؟

ويجي واحد غير مهتم بالتصوير أو شايل هم يشيل الكاميرا ويقول “صور بالجوال وخلاص”

السفر بالكاميرا – الأدوات

أحب السفر زيكم، أحب أسافر وأشوف أشياء جديدة.

وأحب أصور في السفر كثيـــر.

بس المشكلة أحب أصور ماكرو وأحب أصور حياة الشارع وأحب أصور حياة برية وأحب أصور تصوير معماري داخلي

وأحب أصور تصوير معماري خارجي وأحب أصور بورتريه وأحب أصور طبيعة وأحب أصور بتعريض طويل

كل هذا أحبه. معناها لو بسافر يبي لي أخذ كل العدسات

بس لحظة…

أحب أصور في الليل كثير

وأحب أصور بورتريه بإضاءة الفلاشات

وأحب أصور حياة صامتة

على كذا بحتاج فلاشاتي

طيب وش وضع الخلفيات ؟

وش وضع طاولة التصوير ؟

!!!!

وش رايكم أسافر كذا ؟

أو أعين سكرتريه وأسافر كذا..

السفر بالكاميرا

كثير منا وقت السفر يخطط للمكان اللي بيسافر له ويتخيل مناظر كثير حلوة وكيف يصورها.

يمكن بعد يدخل الانترنت ويبحث عن مصورين صوروا نفس المنطقة. بس إذا جاء وقت السفر يبدأ الواحد يسترجع كل المناظر والتخيلات اللي شافها خلال بحثه.. ويتوقع انه بيصور كل شيء .. ثم يجي على باله السؤال التالي

آخذ أغرضي كلها ؟

ووش أسوي وأنا شنطتي صغيرة .. أو وش أسوي وأغراضي كثيرة ؟

في هذا الموضوع بنتكلم عن السفر بالكاميرا وبعض النصائح العامة حين السفر بالكاميرا

السفر بالكاميرا

أول نقطة وأهم نقطة برأيي .. هو سبب السفر

هل أنت مسافر عشان شغل

أو مسافر عشان سياحة

أو مسافر عشان تصوير ؟

بنتكلم عن كل الناس اللي بتسافر عشان أهداف غير التصوير ، بس ودها تصور وقت السفر

السفر بالكاميرا

قبل السفر بأسبوع على الأقل، تأكد ان أغراضك موجودة بالكامل.

أحياناً تكون ناسي الشاحن عند الشباب في الاستراحة

أو أحد عدساتك مع أحد الأصدقاء

جمع الأغراض وتأكد انها موجودة عندك.

وتأكد ان كاميرتك نظيفة.

السفر بالكاميرا

وقت السفر، فكر بأغراضك كثيــر

كثرة العدسات والفلاشات يمكن تضيع وتلخبطك كثير

إذا عندك عدسة 18-200

وعدسة 18-135

وعدسة 18-55

ليه تآخذهم كلهم  ..

تكفيك عدسة واحدة 18-200

صح فيه اختلاف في الأداء بس يعتبر اختلاف بسيط.

فكر في آخر مرة سافرت فيها.. هل احتجت كل أغراضك ؟

تتوقع تحتاج أكثر من فلاش خارجي ؟

هل انت تستخدم الفلاش الخارجي كثير ؟

تحتاج في الأساس لفلاش خارجي ؟

طيب عدة التنظيف ؟

تحتاجها.. أو يكفيك المنديل الخاص بتنظيف العدسة/النظارة ؟

تحتاج كل الفلاتر اللي عندك ؟

اسأل نفسك هذه الأسئلة، وخفف على نفسك بالإجابة عليها

ولا تنسى تسأل نفسك عن حامل الكاميرا.. هل تتوقع تحتاجه ؟

السفر بالكاميرا

قبل السفر أكيد عندك معلومات عن المكان اللي بتسافر له

إذا انت بتروح لفرنسا .. أكيد تعرف ان فيها برج إيفل

إذا بتروح للإمارات يمكن تكون تصفحت مواقع تتكلم عن عالم فراري

وأذا بتروح للرياض أكيد تعرف ان التصوير ممنوع في أماكن كثيرة. وهذا هو المهم

اعرف عن المكان اللي بتروح له

هل التصوير مسموح في كل مكان أو لا ؟

في الصين واليابان .. لو تصور الناس محد قايل لك شيء (مهوب عذر انك ما تستأذن منهم)

بس جرب تصور ناس في السعودية ، وشف ردة الفعل

ولا تنسى تتأكد من وضع البلد من ناحية الأمان

لا تمشي في شارع مهجور مع عدسة 400mm

 السفر بالكاميرا

لا تنسى خلال السفر أخذ أكثر من ذاكرة،

وتأكد ان كل الصور منسوخة في جهازك في البيت قبل الصور وان الذواكر فاااضية.

السفر بالكاميرا

شنطة الظهر ممكن تكون أفضل بمرااااحل من أي شنطة ثانية.

شناط الكاميرا اللي تحمل باليد أو الكتف ممكن تكون متعبة كثير خلال السفر.

السفر بالكاميرا

إذا جيت تصور ، تذكر انك تضيف الطابع اللي رايح له (يعكس نفس المكان)

مثل تركيا ، مشهورة بالقهوة التركية .. صور قهوة تركية.

بس فكر تصورها مع السعر حقها

أو كلمة (قهوة) بالتركي أو شعار/علم تركيا

وإذا بتروح لسريلانكا.. صور مزارع الشاي.. بس لا تنسى تصور الناس اللي تقطف ورق الشاي.

لأن المزارع بحد ذاتها تتشابه في أماكن كثيرة من العالم، بس ملامح الشعب في سريلانكا بتوضح المكان اللي أنت فيه

السفر بالكاميرا

قبل السفر، حدد عدد الصور ونوعها اللي تبي تطلع بها.

لا تقول بسافر وأصور كل شيء .. لأنه في الغالب بترجع ب ولا شيء

بس لو قلت .. بسافر وخلال السفر بركز على تصوير البورتريه.. بتكون نتائجك أفضل.

السفر بالكاميرا

صور الذكريات ، صور الواتس اب ، صور الانستقرام ، صور الفيس بوك .. هي مجموعة صور جميلة.. بس لا تخليها عذر لأنك ما تطبق قواعد التصوير والتجدد في الأفكار.

لا تقول .. والله صورت صورة وخط الأفق كان مايل .. بس عااادي لأني برسلها في الواتس اب.

السفر بالكاميرا

ابتكر زوايا جديدة.

باستخدامك لأدوات قليلة (عدسة واحدة) ستضطر لابتكار زوايا وأفكار جديدة

فكر قبل ما تصور، ولا تخلي صورتك .. نسخة من صورة شفتها على الانترنت قبل كذا

نتمنى انكم وجدتم الفائدة في موضوع اليوم

كل الشكر والتقدير لكم على دعمكم ومتابعتكم

اظهر المزيد

مقالات ذات صلة

‫2 تعليقات

  1. اشكرك استاذي الغالي على دروسك المفيده وكتب الله لك الاجر
    ولكن عند بحثي عن الدروس السابقه لااجدها كمثال :
    الدرس 11 الى الدرس 18 واتمنى فهرسة الدروس لكي يسهل علينا تصفحها
    وشكرا لك واسف على الاطاله

زر الذهاب إلى الأعلى