[ دروس تصوير ] الدرس رقم ٥ – عمق الميدان

السلام عليكم ورحمة الله وبركاته

نشكر جميع الزوار والمتابعين على دعمهم لنا

وان شاء الله نقدم اللي فيه االفائدة

بالنسبة للدروس المطلوبة .. سيتم طرحها بإذن الله بعد الانتهاء من سلسلة أساسيات التصوير

في المواضيع السابقة تعلمنا مثلث التعريض

وأن التمكن منه يخلينا نتحكم بكمية الضوء

وان العناصر المكونة له تأثر أيضاً على

– تجميد الحركة

– التحكم بعمق الميدان

– زيادة التحبب في الصور.

تجميد الحركة أو تثبيتها .. هو عكس اهتزاز الصور تقريباً وموضوعها بشكل عام بسيط وهو عمل يقوم به سرعة الغالق

بس في مصطلح جديد طلع لنا وهو (عمق الميدان) – اللي تتحكم فيه فتحة العدسة جزئياً.

وش يكون ؟

وش فايدته ؟

من يتحكم فيه ؟

نشوف مع بعض

وش هو عمق الميدان ؟

عمق الميدان أو Depth OF Field

DOF

يقصد به المسافة أو المنطقة اللي تركيزها واضح أو الفوكس حقها مضبوط

يمكن بالصورة يكون عمق الميدان أوضح

نشوف في الصورة الأولى .. الوردة رقم ٢ هي اللي داخه في نطاق الفوكس

والوردتين ١ و ٣ .. خارجين خارج نطاق الفوكس

لكن في الصورة اللي تحتها مباشرة كل الوردات الثلاث داخلين ضمن نطاق الفوكس

شفتوا المسافة هذي .. هي عمق الميدان

وش فائدة عمق الميدان ؟

من نفس المثال السابق يتضح لنا فائدة عمق الميدان هي

ادخال أو اخراج العناصر من الفوكس أو منطقة التركيز في الكاميرا

فيه ناس تسمي الشيء هذا “عزل” بس أتوقع كثير من المصورين يرفض هذا التعبير لأنه غير دقيق

وش اللي يأثر في عمق الميدان ؟

اللي يأثر في عمق الميدان ثلاث عناصر مهمة

– فتحة العدسة

– البعد البؤري .. واللي هو المسافة بين الحساس والعدسة الخارجية

– المسافة بين الكاميرا والعنصر المراد تصويره

وهذي صورة توضح هالكلام

فكرة للتطبيق

حط قدامك عنصرين ورى بعض (علبة ببسي وميراندا) وجرب صور ٦ صور

١- بعد الكاميرا ثابت – البعد البؤري ثابت – فتحة العدسة (٤)

٢- بعد الكاميرا ثابت – البعد البؤري ثابت – فتحة العدسة (١١) – اكيد بتحتاج تغير سرعة الغالق أو الآيزو

وشوف الفرق بين الاثنين

٣- بعد الكاميرا ثابت – البعد البؤري ثابت – فتحة العدسة (٤)

٤-  بعد الكاميرا ثابت – البعد البؤري مختلف – فتحة العدسة (٤) – يمكن تحتاج ترجع شوي بالكاميرا

وشوف الفرق بين الاثنين

٥- بعد الكاميرا ثابت – البعد البؤري ثابت – فتحة العدسة (٤)

٦- بعد الكاميرا مختلف – البعد البؤري ثابت – فتحة العدسة (٤)

وشوف الفرق بين الاثنين

بالنسبة للتطبيق .. أنا طبقت على وردتي وشوفوا النتائج

أتمنى ان الدرس كان واضح لكم

وإذا فيه أي نقطة تحتاج توضيح لا تترددون بالتواصل معنا هنا أو الإيميل أو في تويتر

شكراً لكم