[ دروس تصوير ] الدرس رقم ٨٤ – تنظيف الكاميرا

 

السلام عليكم ورحمة الله وبركاته

كثير من المصورين تمر عليهم فترات يكونون فيها في فترة خمول نوعاً ما. حالياً وفي فترة الاختبارات فيه الكثير من المصورين تاركين الكاميرات في شناط خاصة أو على الطاولة أو موجودة في الملحق. وفيه البعض ما يدرون وين الكاميرا

نتمنى للجميع التوفيق في جميع اختباراتهم والله يعين ويسهل على اللي جالسين يدرسون اخوانهم واخواتهم

خلال جلسة الكاميرا وعدم حفظها بطريقة صحيحة ممكن تكون عرضة للأتربة والغبار والكاميرا وقتها تحتاج شوية تنظيف

وفي موضوع اليوم بعض الأدوات لتنظيف الكاميرا والعدسات

تنظيف الكاميرا

أهم قاعدة في تنظيف الكاميرات والأدوات الخاصة بالتصوير هي الحفاظ عليها

لا تنتظر الأدوات تتوصخ أو تغبر ثم تبدأ البحث عن تنظيفها

فيه بعض الأحيان تكون الوصاخة/الغبار/التراب خارجة عن إرادتنا وتتأثر الكاميرا بأسباب أخرى غير عن الإهمال.

الاهتمام بنظافة الكاميرا بيساعد على الخروج بصور نظيفة ونقية

تنظيف الكاميرا

قبل ما نتعلم عن طريقة تنظيف الكاميرا خلونا نتكلم عن الأسباب العامة اللي تسبب في توسخ الكاميرا.

الوسخ / الوصخ (كل شوي أكتبه بطريقة) بس هو نفس الشيء

الوسخ نقسمه قسمين

١- خارجي

٢- داخلي

تنظيف الكاميرا

صناع الكاميرات خلال تصنيع الكاميرا يهتمون بشكل كبير في المواد الخارجية لتصنيع الكاميرا

دائما نسمع (جسم قوي – جسم صلب – جسم يتحمل العوامل الخارجية من أمطار وغبار)

خلال التصوير لازم تعرف قدرات كاميرتك

لا تصور بكاميرا مدمجة (عامة) تحت الموية.

لكل كاميرا قدرتها الخاصة على التحمل

فيه كاميرات خاصة للتصوير في الأتربة والأمطار

وفيه كاميرات تتحمل التصوير تحت الماء

تنظيف الكاميرا

اهتمامك بالكاميرا مهم قبل التصوير وبعده

قبل ما تصور تأكد ان المكان مناسب للتصوير ومافيه مطر أو غبار أو شيء ممكن يأثر على كاميرتك

وبعد التصوير ، استخدم الشنطة

أكثر المحلات اللي تبيع الكاميرات تعطي شنطة هدية مع الكاميرا

بس اللي نسمعه قليل اللي يستخدمونها

وفي موضوع سابق تكلمنا عن ( شنطة الكاميرا ) إن شاء الله يفيدكم

تنظيف الكاميرا

لتنظيف الكاميرا من الخارج نحتاج مجموعة أدوات بسيطة

ومثلها مثل الشنطة اللي تتوزع بشكل مجاني

كثير من باعة الكاميرات يعطون عدة تنظيف بشكل مجاني

المجموعة هذي بسيطة وسعرها يمكن ما يتجاوز الـ ١٥ – ٣٠ ريال

لكنها مفيدة جداً

المنفاخ

خصوصاً لتنظيف العدسة الخارجية للكاميرا والفتحة اللي عن طريقها تشاهد المشهد وإزالة الأوساخ الكبير

:

الفرشاة

مفيدة جداً لإزالة الأوساخ العالقة في الأطراف

أطراف العدسة الداخلية والخارجية.

تأكد أن تكون الفرشاة ناعمة جداً

:

الممسحة / المنديل

المنديل يمكن استخدامه لمسح الشاشة أو العدسة الخارجية أو الفلاتر

الأدوات اللي ذكرناها يفضل استخدامها من الجهة الخارجية للكاميرا

بالنسبة لتنظيف الكاميرا من الداخل أو تنظيف الحساس. فيفضل عدم القيام بذلك.

الحساس قيمته غالية جداً. وعند الخطأ في التنظيف وتأثره فيصعب إصلاحه .. لازم استبداله

متى أنظف الكاميرا ؟

الكاميرا من الخارج يفضل ان تكون نظيفة دائماً

ومع اهتمامنا بالنظافة ممكن يصير شيء ما ننتبه له

قبل التصوير شف العدسة الخارجية يمكن تشوف غبار أو أوساخ بسيطة تحتاج مسح

والمهم جداً إذا صورت صورة وشفت فيها بقع، فاعرف ان الكاميرا تحتاج تنظيف

كيف أعرف مستوى نظافة الكاميرا

الطريقة بسيطة جداً

من الخارج الحكم بسيط جداً

بس من الداخل ؟

وجه الكاميرا إلى سطح أبيض (أهم شيء يكون نظيف)

صغر فتحة العدسة لتكون صغيرة جداً (٢٢) مثلاً

تأكد ان سرعة الغالق مناسبة

وصور

وشاهد النتيجة

إذا كانت الصورة فيها بقع، فيفضل أخذ الكاميرا لمحل الصيانة

إذا كانت بيضاء .. فاهتمامك بالكاميرا جميل وما تحتاج تنظيف

لمتابعينا

جربت تنظف كاميرتك بنفسك ؟ وليه ؟

قد سألت محل الصيانة عن سعر تنظيف الكاميرا ؟

شاركنا بتجربتك خلال تنظيف الكاميرا

شاركنا بصورتك الخاصة بمعرفة مستوى نظافة الكاميرا

نتمنى أنكم وجدتم الفائدة في موضوع اليوم

شكراً لكم على متابعتكم ودعمكم لنا